LES - Informilo

Hejmpaĝo > 2007 > Novembro > Lunde la 1an de oktobro

Lunde la 1an de oktobro

sabato 13a oktobro 2007, de Nancy


Vidi konektite : Esperanto Gacond

Claude Gacond tre lerte retenis nian atenton, rakontante siajn spertojn kiel profesia radiopreleganto en Berno ĉe Svisa Radio Internacia inter 1962 kaj 1992, do ĉiusemajne dum 30 jaroj ! Ofte apenaŭ 10 minuta elsendo kaŭzas al prelegonto tutsemajnan laboron !

El la unuaj 15 jaroj li povis konservi nur siajn notojn, tio estas 700 tekstojn, kiujn li nun ĵus zorge retajpis por meti ilin sur sian retejon. Sed li posedas registradon de la elsendoj ekde 1977, kaj ĝuste pri tiu jaro li ĉefe parolis al ni, ĉar tiu dato respondas al 25 jaroj de esperantiĝo, por li kiel por lia edzino Andrée, kiu dialogis kun li sur la kurtondoj. Tiam dum 6 elsendoj li rakontis sian riĉan esperantan vivon.

Claude klarigis al ni, kial la ricevo de tiuj elsendoj bonis ĉefe nur fore de Svislando : ĉar la kurtondoj reflektiĝas plurfoje kontraŭ la altatmosfera jonizita tavolo, plejofte nur post la tuta rondiro ĉirkaŭ la tero ili atingas la elsendlandon !

JPG - 73.2 kb
Claude Gacond en Lausanne
Alklaku por pli granda versio

Je la fino de la unua elsendo, kiun ni aŭdis, Olivier Tsaut kantis ĝuste mian preferatan kanton « Matenkanto » ! Claude klarigis, ke tiam li proponis havi ne anglan muzikon. Tio alportis problemon, ĉar kutime la radioj elsendas 26% da angla muziko por ricevi diskojn kaj subvencion de Usono !

Claude plurfoje vojaĝis, ĉar liaj elsendoj estis tre ŝatataj, kaj li estis invitita prelegi ekzemple en Parizo pri la penso de Privat, pri la Ruĝa Kruco en Italio, pri federalismo en Britio kaj Pollando.

Por niaj lundaj renkontiĝoj Claude instigas nin kelkfoje uzi liajn tekstojn kaj registradojn por lerni pli bone prononci la lingvon, ekzerciĝi pri kompreno dum aŭdado sen teksto sciante, ke venos 3 ekzercaj demandoj…

Claude ankaŭ parolis pri la nuna problemo de la lingvoj en Svislando : aliĝo al Eŭropa Unio metus la alemanojn en minoritatan situacion, dum la romandoj praktikas eŭropan lingvon… Eble pro tio la alemanoj donas la preferon al la angla, eĉ prefere al la uzo de la germana…

Per la radioelsendoj ni eksciis, ke Claude kaj Andrée konatiĝis en la porinstruista lernejo de Neuchâtel kaj dum kursoj de esperanto. Claude estis aktiva membro de Internacia Civila Help-Servo. Ekde 1953 li vizitis TEJO-kongresojn, kaj ni bone komprenis, ke ne taŭgas peti koverton meznokte… anstataŭ kovrilon ! Li frostis, meditante pri la nepra bezono ellerni esperanton ! Aŭskulteblas tio en la 738-a elsendo.

En Hilversum (Nederlando), 1954, dum TEJO-kongreso, naskiĝis la esprimo „Ne krokodilu !“ Antaŭe oni diris „Ovo ! Ovo ! Ovo !“ kontraŭ la nacilingvaj parolantoj en esperanta medio.

Post la hungara kontraŭrusa ribelo Claude Gacond invitis la rifuĝinton Istvan Morocs kaj, sekve al memorinda fonduo, la lerneja komisiono de la Sagne, kun la apogo de la inspektoro, instigis lin eksperimente instrui esperanton en elementa lernejo. Tiel komenciĝis 8 jaroj de E-instruado. Li rakontas tion en la prelego 740-a.

Claude ofte organizis esperantajn skiferiojn en Adelboden, la unuan en vintro 1956-57. Dank’al li kreiĝis la asocio Esperanto-Edukistaro, Kultura Centro Esperantista, CDELI, la Gastejo Edmond Privat, Internacia Feria Altlernejo, ktp. Sed nepre legu kaj aŭskultu tiujn radioprelegojn sur lia retejo, kie iom post iom ili registriĝas skribe kaj aŭde : www.esperanto-gacond.ch

Dankon al vi, Claude !

Respondi al tiu artikolo


Observi funkciadon de la retejo RSS 2.0 | Retejo-mapo | Privata spaco | SPIP | skeleto